Suriin Mo

Ayon sa likas na batas, sa di malaon tayong lahat ay haharap sa katotohanan… walang makakaiwas… hindi rin puwedeng pagtaguan! Kaya ang pagsusuri ay siya na lamang ang nalalabing paraan na maaring makakapagbigay liwanag sa karimlan ng natutulog nating  kaisipan…

suriin mo.

 

    Ang di pagkakaunawaan ay tila wala na yatang katapusan. Ang panlilinlang ay numero unong suliranin ng bayan; subalit, ikaw ba ay talagang naging tapat sa iyong sarili?

     Ang pagkukunwari ay malaking problema ng madla …ang udyok ng hangaring lugmok ay siyang dahilan kung bakit ang ating paninindigan ay naging marupok …huwag kang mabahala, ito’y dapat lang na ating madaanan, ito’y dumadating na hindi natin inaasahan …sa iyong pagkadapa, may aral kang natututunan …sa iyong pagbangon, ang pag-asa ay umaahon …ito ay iilan lamang sa mga dahilan, kung bakit tayo ay naririto sa lupa… may dapat tayong gampanan , kayat kilalanin mong mabuti ang iyong sarili…

suriin mo.

Magulong mundo… ikaw nalilito…

Ang mga tao…nababalatkayo…

Lahat na tutuo… ay pinaikot mo

Kaya ’di mo alam ang ’yong hahantungan…

     Oo, ikaw ma’y naging biktima o ikaw man ang naging dahilan …huli na ang lahat kung iyo pang pagsisihan… at, wala namang dapat pagsisihan, dahil ang iyong mararanasan ay dapat lang na iyong madadaanan … masakit …maaliwalas… kalungkutan o kaligayahan man, ito ay landas na sa iyo’y nakalaan magmula pa ng ika’y isinilang dito sa sanlibutan…

suriin mo.

Tumigil ka sandali, at tingnan mo sa salamin ang ‘yong sarili

Huwag mong pansinin… panlabas na anyo, kalimitan ay ’di tutuo!

     Sa halip ay, palusutin mo ang iyong paningin sa likod ng salamin, bigyan mo ng pansin ang nakatagong katotohanan na tanging ang puso mo lamang ang nakakaalam …ngunit sa iyong pamumuhay ang puso ay iyong kinalimutan …magarang damit at mga palamuti sa katawan, ay pawang mga maskara lamang, ito ang iyong nakikita tuwing ika’y nananalamin …marami sa atin ang nakakulong sa panlabas na imahen… kayod kaliwa’t kanan upang matugunan ang kagustuhan ng katawan… sa buhay, ika’y minsan lamang dadaan,  ito ay iyong dapat pag-isipan …

suriin mo.

Pagmasdan mo ang kalooban ng ‘yong kaluluwa

Ikaw ba’y tutuo? …o pagkukunwari lang ang iyong pagkatao?

    Ang mga kataga na iyong niluluwa ay ang laman ng iyong kaluluwa …walang kinalalaman ang imahen na nasa salamin …kaya’t sa pag-sasalita maging maliwanag, marahan at banayad ng ika’y maintindihan …at ang pananalita na walang katuturan ay dapat lang na iyong iwasan …

suriin mo.

Taong hipokrito… bunganga mo ay puno ng kabutihan

Subalit ang tutuo…lahat ng iyong ginagawa’y- makamundo!

     Ito ay isinulat para sa salarin… ang pinaka-ugat ng lahat na sinungaling… tuwing araw na linggo, bitbit ang Banal na Kasulatan…inuutusan ang mga anak na magbihis, dahil sila’y pupunta ng simbahan… Banal na maskara ay isinuklob sa mukha …pakitang tao na taimtim na nananalangin …taos puso ang pagsisisi sa mga kasalanang ’di mawari na kahit ang Diyos na nakikinig ay hindi makakaintindi … sa likod ng maskara- may aswang, na nakatawa …dahil sa akala niya na ang lahat sa kanyang paligid ay kanyang napaniwala, sa kanyang adhikain na 'totoong sinungaling'. Iginiit ang sarili at at dahan-dahan ay palihim na nagpasimuno sa Asin; na ayon kay Saro noong siya ay buhay pa ay - ‘asin-asin’...

suriin mo.

Taong makamundo, lampas langit ang iyong panalangin

Subalit ang tutuo, ang sinasamba mo ay materyalismo!

     Sakit ng lipunan …malalang sakit ng Asin na nag-aasin-asinan …sa sinungaling na isipan, nakikihanay sa marami na pinipiga ng pamahalaan …sa likod ng salamin- pansariling kapakanan lamang ang nasa isipan… nilapatan ng himig ang mga katagang walang laman… walang lasa ang Asin na nag-aasin-asinan… wa-epek ang mga tugtugin na nagmula sa bibig ng sinungaling…

suriin mo.

Ikaw sisingilin… ito ay darating

Ito ang batas ng nasa itaas

Ito’ng kagawaran ng iyong kasakiman

Ikaw sisingilin…ito ay darating !

  

     …ang pabulong na sigaw ng katotohanan … naging multo sa iyong utak ang mga kataga na nakasulat …hanggat sa umabot na sa sukdulan ang iyong panlilinlang, di na kayang itago ng iyong sinungaling at ang hibang mong hangarin …ika’y nag-alsa balutan tumakas sa ibang bansa …subalit ang multo sa salamin sa ‘yo lagi nakatingin …salarin sa harap ng salamin, uminom ka ng tubig bago matulog, baka ikaw ay bangungutin…

suriin mo.

     Sa batugan mong asawa, na ang likod ay laging nakadikit sa kama …namumuhay sa panaginip na ang suwerte ay kusang lalapit …minsan siya’y inangat ng tadhana, binigyan ng puwesto… pina-upo sa trono… ito’y kanyang inabuso hanggat siya’y hinubaran ng kamay ng katotohanan, binigo ng tadhana ang kanyang tusong hangarin  …sa kanyang paniwala siya ay nagniningning, ngunit sa kanyang pag-gising, ang mukha niya ay may uling… may kumakatok sa iyong pintuan …naniningil !

…suriin mo.

Huwag mong walain… puso’t kaluluwa,

Pag ito’y wala- mawawala ka rin.

     Sa natira mong katinuan itong habilin ay iyong unawain …at pilitin mong gawin sa mga araw na darating… Buhayin mo sa iyong kalooban ang pinatay mong kaluluwa …taglayin mo sa iyong puso ang karunungang-  umunawa… sa mata ng mga nakakaalam, isang krimen ang iyong ginawa, ng inilagay mo sa iyong maruming kamay ang magandang adhikain ng  mga nagpasimula …sadyang ikaw ay isinali at inilagay ng tadhana, tulad ni Hudas na sa kay Hesus isinama…

suriin mo.

 Mamuhay kang buhay… huwag tatanga-tanga

Walang ospital ang mga tanga !

      Ang pakikibaka na inyong pinasukan ay palihim ninyong tinalikuran… ang kaaway na inyong kinasusuklaman, ngayon sa kanya kayo’y naninilbihan… ang mga sinisigawan mo noon sa mga himig na nilikha lamang ng iyong isip  -ikaw na ngayon ’yun!

…suriin mo.

                    

      Ako sa iyo nangungusap sa ‘level’ ng iyong pag-iisip… inaamin ko, minsan ako ay naging katulad mo; subalit, ito’y kayang lampasan ng di ka matulad kay Christopher de Leon na Tinimbang ngunit Kulang. Ang ‘level’ ng iyong pag-iisip, para sa akin ay ang pag-iisip ng tao na walang isip,  pinatikim lang kita ng sarili mong gamot… nauunawaan kita… magbago ka…bago pa man mapigtas ang iyong sarili sa tutuong madla…at matuluyan ka na, na magiging tanga! …maigi-igi na lang ng kaunti kung mabubu-ang ka, dahil may pagamutan para sa mga baliw, pero pag ikaw ay nagiging tanga …naku, wala ka ng pag-asa …dahil?   

                       (walang ospital para sa mga...alam mo na.)

…suriin mo.

      

     Aaaaaat… pag ang sarado mong isip ay mabuksan na ng kaunti at nai-angat na rin ng kaunti ang iyong pag-intindi…puwede ka ng ilipat sa grade 5 mula sa grade 4 …Puwede na kitang akayin, at tayo’y  sisigaw ng sabay sabay :

Kapit kaluluwa…sundin mo ang wastong gabay sa paglalakbay

Ang kamulatan ang dapat nating lahat matutunan…

   Ang kamulatan, sa tutuo lang ay di natututunan… sa tamang panahon, at sa pamamagitan ng mataas kaunti na pag-uunawa ito’y kusang sumasanib sa iyong kaluluwa …subalit para sa talagang walang alam ito ay dapat munang pag-aralan …kaya?

…suriin mo.

    Pag ang sulat kong ito ay umabot na sa iyong puso, at di lamang sa bagay na nakapatong sa leeg mo…kusang lilitaw ako sa harapan mo …lalabas sa salamin na sa iyo nakatingin …at kapit kamay tayong magdiriwang sa natamo mong …

KAMULATAN…

(mula sa kalangitan ay maririnig ng paulit-ulit ang katagang iminungkahi.)

kamulatan . . . kamulatan . . . kamulatan . . . kamulatan . . .

tann. . .tannn. . .tannn. . .tannnnn. . .

        Suriin Mo

lyrics and music    : noy pillora

from the album     : …ang karugtong

back-up vocals     : ginji

noy pillora (Mike "Nonoy" Pillora) is a Filipino singer, songwriter, composer, arranger, performer, painter, sculptor, and was a creative writer for Focal Magazine (Serving the Filipino Communities in Israel).

noy had been in the Philippine music scene for three decades of his life. He started singing with Saro(Cesar  Baňares Jr.) and they were simply known as; ‘ Mike & Cesar '. After a year as a duo, Nene (Lolita Carbon) joined them and together they became one of the Philippines’ most popular group named ASIN. Together with the release of their third album, Himig ng Lahi, Pendong (Fred Aban Jr.) officially, became the fourth member of the group.

BANTAYOG (Mahiwagang bayan, mahiwagang tao)

Tingnan mo …tingnan mo ! sa kabilang ibayo,

may tao … may taong ! kumakaway sa ‘yo !

Siya’y may hawak na ‘di alam kung ano…

may gustong ipahiwatig, sa damdamin mo…

        Siya ay makikita sa lahat ng sulok ng ating bansa…sa gitna ng mga ‘plaza’… sa bungad ng mga paaralan… sa mga kabayanan… sa mga kanayunan…  sa tabi ng daan… sa  bukana ng mga baryo… sa harap ng munisipyo… at kung saan-saan…

Simbolo ng karunungan…simbolo ng katatagan… 

simbolo ng kalayaan… simbolo ng kagitingan…

        Kalabisan  siya ay may hawak na libro… minsan ay nakaupo… karamihan sa kanila ay nakatayo…mayroong sakay sa kabayo… may hawak na itak… may hawak na baril… may hawak na kung ano-ano… mayroong nahulog sa hagdanan sabay na lumipad ang ibon na simbolo ng kalayaan…
     
        Ikaw naman ay nakamasid… nagtatanong… nagtataka… hinuhukay ng iyong diwa ang nakabalot na hiwaga… ang istorya sa likod ng magiting na bato… sa init at ulan siya’y matatag na nakatayo… tulad ng kanyang prinsipyo, ‘di mauntag ng kahit anong bagyo…sa isip mong naguguluhan, hinahanap ang kabuluhan ng mithiin nitong taong bato.
 

Sabay sa ulos ang kanyang alituntunin…

 sabay sa agos ng ilog sa bukirin…

‘Sintalim… ng kidlat ang kanyang mga tingin

‘Sinlakas…  ng kulog!  ang sigaw…

ng damdamin….

           Ang damdaming nagsasalita ay walang lumalabas na kataga… ang nagsusumamong puso, dulutan mo ng unawa… ang kanilang ipinaglaban ay bigyan mo ng halaga… ang mga luha na kanilang iniwan, ay mabigyan man lamang ng katuturan … upang itong mga marangal na kaluluwa ay mabigyan ng katahimikan…

Tumigil ka sa paghakbang, at siya’y pagmasdan

Ang kanyang mga kamay na sintigas ng tigang

Siya’y sumisigaw ng kung anong adhikain,

Ano nga ba kaya ang kanyang layunin ?…

           Ang kanilang mga kaluluwa na lumiligid-ligid… di mapakali sa mga nangyayari… nagtatanong sa salinlahi… Saan mo dinala, ang mga adhikaing ipinaglaban?... Bakit mo itinago ang mga aral na dapat matutunan? …Kami’y nakipaglaban upang ang salinlahi ay mai-ahon sa miserableng kalagayan…nguni’t, bakit hanggang ngayon sila’y gumagapang sa kahirapan ?

“Sino ang tinutukoy nitong taong bato ?”

         …tanong ng iyong espiritung nalilito… ang ‘yong utak na tila nahihilo, umikot na parang ipu-ipo… ika’y napatingala sa langit, at buong lakas na iyong  isinigaw,  ang hinagpis ng iyong puso…

Mahiwagang bayan….mahiwagang tao

Ang maskara’y hubarin mo...

ipakita mo ang tutuo !

        …pinagpatuloy mo ang iyong mga hinagpis… ika’y may sinisisi, ‘di namin alam kung sino? ... isinigaw mo sa kalawakan ang nabu-buwang mong kalooban…

Itinuro mo’y kalokohan . . . itinuro mo’y kasakiman,

Itinuro mo’y kasinungalingan

Bayan ano’ng hahantungan ?

        ‘Busy’ ka sa iyong mga reklamo… nawala sa ‘yong isip ang taong bato…marahang gumalaw ang kanyang anino… parang nalulungkot na napayuko… may dunong na sinasabi, at ibinulong  sa iyo…

        “ May mga taong itim ang puso, na nagtatago  sa kanilang mga anino  … matatamis na mga kataga ang lumalabas sa kanilang dila… puno ng pag-asa ang kanilang mga pangako… subalit, ang sarili lamang nila ang gusto nilang ihango… Sa aming hanay noon, ay mayroon ding nakahalo na ganitong klaseng tao…”

        Buksan mo ang iyong mga mata… amuyin mong mabuti ang nasa iyong tabi … ang mga manlilinlang ay madali mong malaman, kung hindi ka nagsisinungaling at nanlilinlang … ang mga bulok ay madali mong maamoy, kung malinis ang iyong hangarin dito sa mundong ginagalawan…

         Ang bawa’t galaw mo sa mundo ay may katugunan… ang lahat na iyong inu-utang ay iyong binabayaran… (utang sa pera lang at materyal ang puwede mong takbuhan… subalit, hindi ito ang ating pinag-uusapan, noh?!? ) Kaya ituwid mo muna ang galawgaw mong isipan… makinig kang mabuti sa aral na dapat mong matutunan…”

        Marahang hinaplos ng anino ang iyong ulo… marahang humakbang at siya’y napa-upo sa isang ‘di kalakihang bato…

        “Makinig kang mabuti sa mga sasabihin ko… ito’y nasabi na ng lumipas na panahon, subalit uulitin kong muli at walang sawa kong uulitin, hangga’t sa ang lahat ay magiging matino dito sa mundo.  Upang mabigyan ng tamang kahulugan ang buhay na aming inalay, at ng mabigyan ng pag-asa ang mga nahihirapang kaluluwa, na lumalakbay sa landas ng buhay dito sa lupa…”

        Kunot-noo akong nakinig sa minumungkahi nitong anino, na nagpapatuloy sa pagsalita habang nakatingin sa malayo…

        “Huwag mong i-asa kahit kanino ang iyong kinabukasan… usisain mong mabuti ang iyong mga natutunan… ituwid mo ang mali at ang wasto’y gawing sandigan… iyan ang kabu-uhan ng adhikain na aming ipinaglaban…  

        Nawalan ng saysay ang lahat na aming ipinaglaban… ginamit ng  mga gahaman ang aming mga pangalan… sinakyan ang aming magandang layunin at malinis na adhikain… ginamit sa pangguguyo… sa panlilinlang ! …upang mapasa-kanila ang kapangyarihan ...nilagay sa pera ang aming mga mukha… perang ginawa nilang diyos at ngayon ay kanilang sinasamba…

        …at, hindi mo ba napupuna? Itong mga gahamang manlilinlang, pag namatay ay nililibing din sa libingan ng mga bayani! …hindi man lang nahiya sa kanilang mga sarili…Ano namang kabayanihan ang kanilang ginawa para sa kanilang kapuwa?

        Tulad ng nasabi ko na… sa aming lupon ng mga bayaning magigiting may mga huwad na nakahalo, upang samantalahin at yurakan ang kanilang kapuwa, at sila rin ay ipinagbunying bayani ng mga ‘bulag’ dito sa madla…

        “Katulad din ito sa ngayon, na nangyayari sa iyong panahon, na mayroong mga malinis na kululuwa na nakahalo sa nakakaraming mga masasama,  sila ang dapat mong tularan at ang siyang gawing huwaran… nang ma-ihango mo ang iyong sarili sa dinadanas mong kahirapan”

        Nanumbalik ang iyong ulirat sa narinig mong salita … ang araw ay bumaba na at ang anino ay nawala… ang tanging nalalabi lamang ay ang kanyang mga kataga, at ang panalangin na sana ito’y manatili, sa iyong diwa…

        Para kang napako sa iyong kinatatayuan… ang bantayog sa ‘yong harapan ay nais mong hagkan… sa aral na iyong natutunan ay nais mo siyang pasalamatan; subalit, ‘di ka makapagsalita nananatili  sa pagkamangha…

         Ilang saglit lamang at kinain na ng takipsilim, ang hugis ng kanyang katawan pati na ang kanyang mukha… hangga’t sa hubog na lamang ng kanyang imahen, ang maa-aninag ng iyong mga mata …  sinukluban na ng dilim ang monyumentong nakatayo … ang taong bato ay unti-unting naging anino…

        Humayo muli ang iyong isipan, sa bayang sinilangan, perlas ng silanganan… isa-isang inilarawan ng iyong diwa ang mga liderato na nagpapasimuno… malalim ang isip ng iyong damdamin…’sinlalim ng tanong ang iyong puso ?

Mahiwagang bayan  …  mahiwagang tao,

Ikaw ba ay Pilipino ?   ………   Pilipinong tutoo ?

Mula sa apat na sulok nitong mundo, sa hangin ay maririninig ang agrabyo ng mga puso ,

nakatuon ang mga mata sa lupon ng mga nagpapasimuno… 

Mahiwagang bayan ......... mahiwagang tao,

Ikaw ba ay maka-tao?  

O

Ikaw ba’y para sa iyo ?

"Bantayog"

lyrics and music         : nonoy pillora
performed by              : ASIN
from the album          : Himig ng Lahi

noy pillora (Mike "Nonoy" Pillora) is a Filipino singer, songwriter, composer, arranger, performer, painter, sculptor, and was a creative writer for Focal Magazine (Serving the Filipino Communities in Israel).

noy had been in the Philippine music scene for three decades of his life. He started singing with Saro(Cesar  Baňares Jr.) and they were simply known as; ‘ Mike & Cesar '. After a year as a duo, Nene (Lolita Carbon) joined them and together they became one of the Philippines’ most popular group named ASIN. Together with the release of their third album, Himig ng Lahi, Pendong (Fred Aban Jr.) officially, became the fourth member of the group.

Balita

" Noy…”………. “Nooooy…” marahang panawagan ng boses sa hagdanan ng aking kubo… ako’y  marahang dumilat at napatingin sa siwang ng bintana… na-aaninag ang kaunting liwanag na dulot ng bukang liwayway… sa natutulog na utak, ako’y dahan dahang lumabas sa kumot ng panaginip na bumabalot sa aking isip… Ang taghoy ng panawagang … “Noooooy… !” ay nagpapatuloy …nangungulit …nang-iistorbo …nang-aasar…

          “ Ano ba !!??” …ang pasigaw na sagot ng aking isip… habang ang dalawa kong paa ay humahakbang patungong pintuan…Nang aktong bubuksan ko na ang pinto ay…  Pabulong na sumigaw ang boses na nag-pakilala… “Noy! ...si Joe ito!”…ang hirit ulit ng boses na nangungulit…

         “Joe???”…sinong Joe ??... ang pasigaw na tanong ng aking isip… “Joe Crime ? ?” ang gumugulong na kuwento sa  naalimpungatang, si ako! … si Joe Crime ay ang taong hindi nagbabayad ng utang ! …ang tanging tao na may karapatang hindi mo puwedeng pagbabayarin ngayon at kailanman !

                   … sa dahilan na; 

‘ Crime does not pay.’

The Black Eyed Peas - The APL Song ("Balita" of ASIN Band)

        Halos sabay sa aking paglabas… napatanong si Joe na ngayon ay maliwanag na sa akin na hindi ‘Crime’ ang apelyido… “Narinig mo ba ang balita ?”… Napatingin ako sa langit habang sumasagot ang aking isip; “Naku! sa  lahat ng tao dito sa mundo, ako pa ang tinanong mo ng ganito!... ni hindi nga ako nagbabasa ng diyaryo… at sa kubo ko ay walang radyo!” (sobrang liit na pag dinagdagan pa ng radyo ay masikip na masyado!)

Balisa ang kanyang mukha… may lungkot ang mga kataga na ikinuwento ang kanyang sadya… Narinig daw niya kagabi sa radyo na ibinalita, na si Saro na taga Marbel, South Cotabato ay binaril sa ulo !

 Saro?...sinong Saro ? iyan ngayon ang tanong mo…

          Si Saro….’yung kapitbahay ni ano ! ...pinsan ni kuwan! …‘yung may tindahan ng muwebles pang-bahay sa may Alunan Avenue… sa harap ng palengke mismo… siya ‘yung lumikha ng kantang ‘Masdan mo ang Kapaligiran’ …ang Bayan kong Sinilangan, Timog Kotabato’ …’Gising na Kaibigan’ … ‘Itanong mo sa mga Bata’… ‘Balita’…atbp. ‘Yung isa sa mga miyembro ng grupong ‘Asin’…

Asin ?? … anong asin ? ?

        …wow! ang kulit !!? … ano pa? …’di ‘yung kasama ng paminta, vetsin, mantika… ginagamit na pang-gisa… hinahalo sa luto… minsan nagsisilbing ulam pag ika’y walang- wala… ang tawag sa ganitong ulam ay –tuldok! Pag bagoong– kudlit! Teka, bago tayo tuluyang mawala… balik tayo sa Balita…

        Umakyat ang init ng aking katawan papunta sa aking ulo…ako’y nanlamig  na parang binuhusan ng yelo… pakiramdam ko’y parang kinuyamos ang aking puso… ako’y nagsalita subali’t sa aking bunganga ay walang lumalabas na kataga… sa halip ay aking naririnig, ang tinig ni Saro sa kalawakan ng aking isipan… parang, ang layo ng boses na nagsusumamo…

      

Lapit mga kaibigan at makinig kayo;

ako’y may dala-dalang balita,

galing sa bayan ko …

Nais kong ipamahagi ang mga kuwento,

at mga pangyayaring nagaganap, sa Lupang Ipinangako…

         Parang kahapon lang, ay aking nakikita si Saro sa ibabaw ng entablado…hawak ang kanyang gitara…inuulat ang balita tungkol sa kanyang nakita. Ang ating lahat na naging kalagayan sa,

… naganap …nagaganap …at magaganap…

Ang lupang pinanggalingan ko’y may bahid ng dugo

May mga lorong ‘di makalipad, nasa hawlang ginto

May mga punong walang dahon, mga pusong ‘di maka kibo,

sa mga pangyayaring nagaganap…sa Lupang Ipinangako.

        

         Ako na ngayon ang nagsusumamo… liwanagin mo, ang kahulugan ng mga kataga …ihambing sa kasalukuyan ang iyong kinalalagyan …parang, walang pinag-iba ang mga pangyayari,

         …kung ikaw noon ay ang lorong ‘di makalipad, sa ngayon ay tinalian pa ng ‘packing tape’  ang iyong buong katawan at niliitan pa lalo ang hawlang iyong kinalalagyan;

         …katulad mo’y punong walang dahon, na ang tuyong katawan ay naghihintay na lamang sa awa ng may Kagagawan na padalhan ka ng ulan;

         … sa apat na sulok ng lupang sinilangan ay  may mga pusong ‘di maka kibo -  dahil tatahiin ang iyong mga bibig para hindi mo ma-ibuka … o di kaya’y puputulan ka ng dila para hindi ka na makapagsalita… 

laging may nakaabang… nagmamanman… nagbabantay …

Ang kamay na bakal ng may hawak ng kapangyarihan .

       Ay laging handa at handang kumitil ng buhay at buong pusong naninilbihan sa interes ng mga gahaman na siyang may hawak ng kapangyarihan! Mga buwaya na yumuyurak sa ating bansa... ang malungkot pa na balita  na ang mga ito ay dumadami... nanganganak... at ang kanilang sakit na-Kasakiman ay nakakahawa... marami na ang nahawa sa ganitong sakit, ultimong pinaka maliit na tao sa lipunan ay nasasaniban at nag-asal gahaman na rin. Ang natatanging gamot lamang ay ang Kamulatan, at ang unang hakbang upang makamit mo ang gamot na ito ay sinabi na namin noong Talumpu't Walong (38) taon na ang lumipas at ito ay ang - "Gising na Kaibigan". 

         Ngayon ang maiinit na balita doon sa Katimogan ay (lingid sa kaalaman ng karamihan) ang kayamanan  na nasa ilalim ng lupa - Ginto, Tanso, Pilak at marami pang mga Mahalagang Bakal na nagkakahalaga ng limpak-limpak na salapi ITO ! Ito ngayon ang pinag-iinitan ng mga gahaman. Subalit hindi nila magalaw ito dahil may nakatirik na bahay na pag-aari ng tribu /o 'lumad' /o mga katutubo kaya ang pinag-gagawa nila ay basahin mo na lang sa diyaryo na lumalabas doon sa Mindanao...mga lumad sa oras na ito ay natataranta sa pagtago, nagsusumamo na tulungan sila dahil may mga armadong tao na nambubulabog sa kanilang tahimik na pamumuhay... pinagpapatay ang kanilang mga pinuno...ayon sa maykapangyarihan ay wala silang kinalalaman dito...haaaaaay Diyos na Mahabagin. Patawarin mo po ang kasinungalingan na ito... Gising na Pilipino.

Ito ang mga pangyayaring nagaganap sa Lupang Ipinangako.

Aber !? sagutin mo nga itong tanong,

 may pinagkaiba ba ang kahapon sa ngayon?

        …Nagpapatuloy sa paglalahad ng katotohanan itong makata… malalim ang tingin, sa iyong mga mata… ang karamdamang nababalisa, sa iyo’y ibinalita…

Mula ng makita ko ang lupang ito;

nakita ko rin ang munting apoy, sa puso ng tao…

Ginatungan ng mga kabulukan , hanggang sa lumago,

ngayon ang puso’y may takot… sa Lupang Ipinangako.

        Ang  mga kabulukang iminumungkahi, sa ngayon, ay lalong naging matindi… ang munting apoy na siyang pinagmulan, ay sumiklab, lumaki at kumalat sa iyong buong katawan… lumaki ng lumaki… sinunog ang ‘yong kaluluwa… naghalo sa iyong dugo, tumayo ng ‘mansion’ sa iyong puso… sumanib sa iyong buong katauhan at ito’y nagiging -UGALI…  pinalitan mo ang Diyos, sa isang huwad na diyos at siya ay ginawa mong hari…Lumalaganap ang kabulukan mula sa pinakamababang uri ng tao sa lipunan hanggang sa pinakamataas na may hawak ng kapangyarihan … damay ang  lahat ng sambayanan… maliban lamang sa mga hindi nagkakasala at hindi rin nagkakamali… (sino naman kaya ‘yon?)

        Tayong lahat ay nagiging bahagi ng isang salot at nakakadiring ugali na kung tawagin sa inggles ay ‘corruption’. Sa bansa na kung saan ka isinilang, ito’y nagiging tradisyon… naging bahagi ng lipunan… naging ugat ng kahirapan… sa mga mahihirap; ang napipinsala ay ang kanilang sarili lamang, subalit sa mga mayayamang gahaman, sila'y naging pulitiko at hinawakan ang pinaka-mataas na katungkulan, napasakamay nila ang kapangyarihan! … ang pinsalang dulot  ay di  hamak na sakuna ! ...sa karamihan… sa buong sambayanan… sa sangkatauhan !

…isipin mo kaibigan, ito ba’y tutuo? … haka-haka o/ guniguni  lamang ?

        

         Pag ikaw ay dakdak ng dakdak at walang nangyayari sa iyong dinadakdak, ikaw ay …pulitiko… pag ikaw ay pangako ng pangako at walang nangyayari sa iyong pangako, ikaw ay…pulitiko… pag ika’y sumumpa sa harap ng Diyos at sa harap ng Tao, na ang sambayanan o ang sangkatauhan ay iyong pagsisilbihan, nguni’t sa halip ang iyong bulsa lamang ang iyong inaalagaan, ikaw ay …pulitiko… Pag iyong nililinlang ang taong bayan at ika’y nandadaya sa halalan, ikaw ay… pulitiko…kapag umiiba ang iyong mukha pag nakaharap sa kanan at umiiba naman pag nakaharap sa kaliwa, ikaw ay… mahikero (mahikerong pulitiko)… pag ang ‘bubble-gum’ noong isang bata ay iyong inagaw, inilagay mo sa iyong bunganga at nginuya dahil siya’y mas maliit kaysa sa ‘yo, at inangkin mo na ito ay sa ‘yo, ikaw ay… PULITIKO !!!

Pag ikaw ay “Laging Handa”

… ikaw ay – ‘Boy Scout’ … pag babae - ‘Boy Scout - girls …’

Ay!...Girl Scout , pala!

          Pag ikaw ay isang nilalang,  may hawak na mataas na katungkulan sa bayan, at dahil sa pagmamahal na nasa  iyong puso, ay ibinigay ang iyong sarili sa pagsilbi sa iyong kapuwa… sa sambayanan …sa sangkatauhan… at nagsusumikap na mapa-angat ang kalagayan ng mga nagdurusa at nahihirapan, ikaw ay…TAO.

          Pag ikaw ay lampas na sa mga sinabi ko at kaya mong lumakad sa ibabaw ng tubig sa sapa… o di kaya’y pag ikaw ay naglalakad at ang iyong mga paa ay nakaangat sa lupa… may sinag na naa-aninag sa ibabaw ng iyong ulo, ikaw ay…SANTO.

        Itong makata ay atat-na-atat na, sa inyo at sa inyong pagka -walang bahala… 

bakit???......baKIT ??......BAKIT ?

        …ang pasigaw niyang tanong ??? …sa mga tao na nakapiring ang mata… ang iba naman ay nakalinya na may kadena sa paa… mayroong pasuray-suray, lagging nakatuon sa lupa ang mga mata… may nakabaluktot sa gutom, nakahiga sa bangketa … mga batang walang bahay sa lansangan gumagala… marami ang ‘bumigay’ dahil wala ng magawa’t, naging ‘taong-grasa’  na naglalakad sa kalsada…

         Subali’t ang katotohanan, na halos lahat sa tinatawag nating - ‘karamihan’ …ay umiiwas… lumilihis…nagtatago sa kanilang sarili… upang ‘di maabot at masabunutan ng kamay na bakal na makapangyarihan… o/ di kaya’y makalmot ng makamandag na kuko ng mga pulitiko…ito ang kinatatakutan ng tao… ito ang gusto ng mga pulitiko…na ang;

          

… ang puso’y may takot !

        Pag ikaw ay isang taong marangal; malinis na hangarin ang sa iyong kalooban, at lumalakad sa landas ng katotohanan… ang takot ay wala sa iyong bokabularyo, ingat ka lang, baka ikaw mapako tulad ni Kristo…na minsan ay lumakad dito sa mundo, ibinunyag ang nasa kalooban, at ibinunyag niya ang katotohanan… O, saan dinala ng mga pulitiko itong si Kristo ?

         Ayun… hinusgahan… pinahirapan… tinusok ng sibat sa tagiliran… inunat ang isang kamay papuntang silangan at inunat din ‘yung isang kamay papuntang kanluran… ipinako sa krus ng mga taong bulok… Dahil ang mga bulok sa Kanya ay natatakot … nabubuko ang kanilang drama! Ang mga bulok na nangungurakot ay laging natatakot ! Kaya ang mga ito ay hindi marunong maglakad ng mag-isa ! Takot !  …laging napapaligiran ng mga bodyguard… may nakabuntot na adviser… organizer… media… peryodista… beautician… manikyurista … pedikyurista… kontratista… masahista; etc. Laging may bitbit na pako… na sa oras na si Kristo ay lumitaw sa kanyang harapan, ay kanyang ibabalik muli sa krus na Kanyang kinalalagyan …

         Mga kawawang nilalang… mga kulang sa pagmamahal ng kanilang mga magulang …mga kulang sa pansin …kaya  gusto laging nasa ilalim ng ‘spotlight’ …nakikipagkamay habang naka-tawang hilaw sa harap ng ‘camera’ …pati ang pagdadasal ay naka-‘televise’ pa !...shooting dito…shooting doon… wooooooooh! …ikaw na! 

        Kung ika’y tutuong tao ...may puso at pakiramdam… huwag mo silang tularan… huwag mo rin silang kasuklaman… sa halip ay, unawain mo ang kanilang kakulangan…

        Maawa ka pa nga, dahil ang hirap ng papel na kanilang ginagampanan …hindi biro na ang tuwid ay iyong baluktutin !... o/ ang papaniwalain ang karamihan sa iyong kasinungalingan !

        Ang panaghoy ni Saro…na nagmumula sa malayong-malayo… lumalakas… humihina … umiikot sa aking ulo…

Dati-rati ang mga bukid ay kulay ginto;

Dati-rati ang mga ibon sinlaya ng tao,

Dati-rati ay katahimikan, ang musikang  nag papatulog

Sa mga batang …walang muwang sa mundo.

         Dati-rati…dati-rati…dati-rati…dati-rati… lahat ay bahagi na lamang ng dati-rati sapagka’t ang ngayon…ay nakabitin na lamang sa ating panalangin… walang katiyakan ang bukas na darating…

         Hawakan mo sa iyong dalawang palad ang iyong kinabukasan…huwag mong ipaubaya sa dila ng manlilinlang… gamitin mo ng maiigi yaong bagay na nakatuntong sa iyong leeg… sige nga …’try’ natin…1+1= ? ...100+100? …siguradong alam mo rin ang pangulo ng bansang Pilipinas sa ngayon? …ang  bise presidente ?...ang pangalan ng iyong kapitbahay?... e, ‘yung umutang sa ‘yo noong isang lingo?

          Eh; ito… 

Ngayon ang Lupang ipinangako ay nagsusumamo,

Patakan mo ng luha ang apoy sa kanyang puso,

Dinggin mo ang mga sigaw , ng mga puso ng taong 

kung inyong dadamhin… kabilang sa inyo.

(…ipaliwanag mo nga, aber ?!?)

"Balita"

Lyrics & music        : Saro Banares Jr.

Performed by         :  Asin

From the album      :  Himig ng Pag-ibig

noy pillora (Mike "Nonoy" Pillora) is a Filipino singer, songwriter, composer, arranger, performer, painter, sculptor, and was a creative writer for Focal Magazine (Serving the Filipino Communities in Israel).

noy had been in the Philippine music scene for three decades of his life. He started singing with Saro(Cesar  Baňares Jr.) and they were simply known as; ‘ Mike & Cesar '. After a year as a duo, Nene (Lolita Carbon) joined them and together they became one of the Philippines’ most popular group named ASIN. Together with the release of their third album, Himig ng Lahi, Pendong (Fred Aban Jr.) officially, became the fourth member of the group.

Isang Aral Para sa Puso

( Handog na alaala sa isang kaibigang nangangalang : Edwin Mercurio na nagmamalasakit para sa mga kapos palad na mga Tribu... sa Katimogan... sa Kanluran... at sa Buong Sandaigdigan )

         Doon sa katimogan ng lupang sinilangan …‘Lupang Pangako’ kung ito’y turingan. May mga nilalang, na namumuhay ng kung ilang siglo na ang dumaan, sa sagradong lupa ng kanilang mga ninuno, na doon na ipinanganak, lumaki …tumanda …at namatay. Sumasabay sa agos ng buhay na nababatay sa kanilang kapaligiran, at ang kabuhayan ay sumusunod sa batas ng Inang Kalikasan. Sila ay ating narinig na… o di kaya, sa mga bagong salta dito sa mundo na hindi ninyo sila kilala, ako’y humihingi ng kaunting sandali,  at ng sila’y aking ipakilala… sila ay nakikilala sa mga pangalang : T’boli, B’laan, Ubo, Magindanaw, Bagobo, Maranaw, Badjao; at marami pang iba. Sila’y nakakalat sa buong Mindanao… tinulak ng sibilisasyon… mula sa kapatagan, hanggang sila’y umabot sa mga kabundukan at sa mga liblib na pook na hindi na-aabot ng kamandag ng tinatawag nating ‘sibilisasyon’ ...
         
          Sa kabilang dako naman; sa bandang kanluran ng naturang bayan, sa mga mala higanteng bundok ng ‘Cordillera’  ay mayroon ding mga naninirahan, na kung ating susuriing mabuti, ay mga kapatid nitong mga nilalang na nasa katimogan. Magka-dikit ang pamamaraan sa pamumuhay at nakasandal din sa biyaya ng Inang Kalikasan…Sila naman ay nakikilala sa pangalang Igorot na nahahati sa maraming lupon; katulad ng: Kalinga, Kankana’ey, Ting’gyan, Ikalahan, Ifugao;  at ang mga hindi ko nasambit ay napabilang na rin sa… atbp.

          Sila ; ang ugat ng ating lahi, ang tinatawag natin ngayon na lahing ‘Pilipino’… sa maikling salita silang lahat ay ating tinaguriang -Tribu… ang ‘Pambansang Minoriya’ (National Minorities).  Tinulak ng kabihasnan sa kabundukan… ang kanilang kabuhayan ay pinalitan ng mga gusali, na karamihan papel ang laman…pinalitan ng mga taong nagtatakbuhan… nagkakagatan… mga sasakyan na humahagibis sa mga daan… at, ang mga pinuno nitong mga tribu, ang mga datu na may taglay na makataong karunungan,  ay pinalitan na ng mga pulitikong puro daldal na lamang…

         Ang pinaka masaklap pa, na ang karamihan sa kanila ay nawala na… naglaho na parang bula ! naging ‘extinct’… tulad ng mga  ‘pintados’ sa Panay,  sumusunod naman ang mga Hanunu-o sa Palawan… at ngayon, ang mga Mangyan sa Mindoro, ang  Aeta… ang mga ‘orig’ na pinoy !… ang siya namang unti- unting binubura ng kapalaran…

         Itong tula ay ang tanging pamana nitong mga nilalang na pinaglihi sa lupa… handog sa mga bagong sibol sa Lupang Hinirang, at ng ating matunghayan ang nakatagong katotohanan…

Dinggin mo ang himig ,ng naglalahong kaluluwa;

Ang Diyos ang patnubay ng bawa’t isa;

tinulak ng lipunan, siya’y mawawala.

      Ang malupit na hagupit ng tinatawag nating ‘kaunlaran’, ang siyang naging dahilan sa paglaho nitong mga nilalang, sa halip na sila’y sinagip, lalo pang idiniin ng kamay ng maykapangyarihan… niyurakan …inabuso…ninakawan ng dangal… habang pinupuri sa harap ng mamamayan… ginawan ng programa na may ‘hidden agenda’… at sa ngayon, ay tuloy tuloy ng bumulusok itong mga tribu sa lupa ! Sila’y nag mamakaawa… humihingi ng unawa … sa akin… sa iyo… at sa ating lahat…

      Ikaw  at  ako,  tayo,  ay  iisa

Tribung naglalaho … ay ang simula

Kung ‘di mo alam… ika’y mangmang.

     Patuloy na dinadaing ang kanyang huling habilin…sa garalgal na boses ay binigkas ang laman ng kalooban… ang kanyang hiling sana'y ating mapakinggan…

Tribu ang pinagmulan … Ang simula nitong angkan,

Ito’y napag-aralan … hindi natutunan

Buksan mo ang iyong puso at ng maliwanagan…

  

     “Ang hindi marunong lumingon sa kanyang pinanggalingan, ay hindi makakarating sa kanyang patutunguhan…” aniya ni Rizal sa sambayanan… ito’y napag-aralan…hindi natutunan. Katulad din ng ating mga isinambit na mga tribu   na siyang bumu-o ng sambayanang Pilipino…sila rin ay ating napag-aralan… isinambit ang kanilang mga pangalan… sa paaralan …sa kolehiyo… sa unibersidad nguni’t, sila’y nanatiling nakalibing sa libro at kuwaderno …sila  rin aking mga kababayan ay,  napag-aralan… ngunit hindi natutunan.

Magdasal tayo sa Aba’ng Maygawa…

      Sana’y magkaisang hanay ang lahat na may taglay na karunungan …sa ating bansa at ganoon din ang ating mga kababayan na nasa ibayong dagat na naninirahan …upang maitulak natin at mapa- abante  ang programa sa edukasyon… ito lamang ang tanging lunas upang malunasan ang kahirapan… at ng masagip natin ang karamihan sa ating mga kababayan na nabulusok na ng tuluyan sa karukhaan…  kung ipag dikit natin ang Negros at Cebu    palagay ko mas malaki pa kaysa sa bansang Israel … pero tingnan mo itong napaka liit na bansa, napakaunlad … dahil ang mamamayan dito ay hindi mo ma-uto! Sa dahilan na halos lahat ay edukado! …marunong mag-isip at may laman ang ulo ! (huminga ng malalim at bumalik sa panalangin… kinakausap  ang sarili habang bumubulong sa hangin…)
 
     O, Diyos na makapangyarihan na siyang Maygawa nitong langit at lupa, gumawa ka ng milagro at ng malinis ang ulo ng mga pulitiko… at bibigyan nila ng importansiya ang mga hinihiling namin dito… at kung sakaling ito ma’y magka tutuo… at ang karamihan sa aming bansa ay magiging edukado… mababawasan tiyak ang mg uto-uto… ganoon din ang mga nagpapaloko… at ganoon din ang mga manloloko … at ang mga pulitiko ay magiging tao... tiyak na masisiyahan ang mga Pilipino, at makapamumuhay ng mapayapa ang natitirang tribu !

amen.

       Kaya’t kung ikaw man ay mayroon pang natirang katinuan, hindi pa huli ang matuto… damhin mo ang pintig ng puso ng tribung nagsusumamo, nang iyong matutunan ito’ng  Isang Aral  para sa  iyong  Puso … buksan mo ang iyong puso at ng marinig mo ang daing ng iyong mga ninuno…(‘please’, lang)

      At kung sakali man na pipiliin mong  manatili sa iyong kahibangan … at nanaisin mong mamuhay sa karimlan na hanggang ngayon ay hindi ka naman nadulutan ng mapayapang kalooban…wala akong karapatan na pilitin kang matuto… bahala ka sa buhay mo! …pero, itong aking sasabihin itaga mo sa bato…

Lahat sa mundo, ay sadyang mawawala,

Ito’y nakasulat, sa aklat ng tadhana,

Tayong lahat  … mawawala.

       Ang iyong kapitbahay… ang iyong nanay… ang iyong tatay… ang iyong kaaway… ang iyong mga kamag-anak… si Noynoy… si Binay… si ka Joseph … si Fernando Poe (nauna na!)… si Francis M (sumunod na!)… si Gary V… lahat ng kasapi ng Eat Bulaga…  si Vilma… si Nora… si Jena… si Doc… si Olmert… si Bush… ang iyong bahay…ang iyong ‘bank account ’… ang iyong utang (sus! natuwa !)… ang iyong aso… pusa… daga… ipis… pulgas… tigidig sa iyong mukha… problema… sakit… rayuma … galit… panibugho……..Lahat  ! !

Oo… lahat !  

.  .  .  M A W A W A L A   !  !  ! 

"Isang Aral Para sa Puso"

Music and lyrics              :  noy pillora
From the  project             :  Ang Karugtong
Adlib intro music by       :  Joel Villaruel  
Back up Vocals             :  Ayelet Hazan

noy pillora (Mike "Nonoy" Pillora) is a Filipino singer, songwriter, composer, arranger, performer, painter, sculptor, and was a creative writer for Focal Magazine (Serving the Filipino Communities in Israel).

noy had been in the Philippine music scene for three decades of his life. He started singing with Saro(Cesar  Baňares Jr.) and they were simply known as; ‘ Mike & Cesar '. After a year as a duo, Nene (Lolita Carbon) joined them and together they became one of the Philippines’ most popular group named ASIN. Together with the release of their third album, Himig ng Lahi, Pendong (Fred Aban Jr.) officially, became the fourth member of the group.

Himig ng Pag-ibig

   

       Lumalagkit ang hangin sa paligid pag ang pinag-uusapan ay ang PAG-IBIG… nangingibabaw  sa isip ang mga gunitain na kung kailan lang ay buhay na karanasan ng halos lahat sa atin. Naging sanhi ng halos nakakamatay na karamdaman na kung tawagin ay  ‘kabiguan’ at, naging sanhi din ng agaw hiningang pakiramdam, labis-labis na kaligayahan kung  iyong makamit ang kamay ng akala mo ay iyong mahal sa buhay.

     

(Video posted by Xarina Ancheta Published on Sep 10, 2012  with caption: "A birthday present for our Kuya abroad. :))"

   
       Di ko lubos ma-aninag ang istorya sa likod nitong himig subali’t sa aking alaala, ay akin pang magunita ang mga pangyayari sa tambalan ng dalawang nilalang sadyang pinagsama ng tadhana sa panahon na kung tawagin ng karamihan ay ‘ Bisperas ng Gunaw’… ang pagka-unawaan ng puso nina Nene at Saro, (mga kauna-unahang miyembro ng grupong Asin, pawang mga masugid na manunulat at manlilikha ng mga awitin,  upang sabihin ang katotohanang nakatago sa likod ng panlilinlang at pangguguyo ng tao sa kapuwa niya tao...  ng Gobyerno na kakambal ng demonyo, nagdulot ng hindi ma-ipaliwanag na kahirapan ng karamihan sa sambayanang Pilipino…

      Maraming himig at tula ang sumibol sa tambalang ito…mga awiting inihatid ng hangin sa nagdurusang mamamayan ng ating bansa na nasa ilalim ng malupit na diktadurang rehimen…  tulad ng … ‘Gising na kaibigan’…’ang Bayan kong Sinilangan, Timog Cotabato’… ‘Balita’… ‘Itanong mo sa mga Bata’… Mga makahulugang awitin na nakikipag-ugnay at nakikipag-usap sa mga pusong pinipiga ng kamay na Bakal ng Diktadurang Rehimen.

      …subali’t ang Pilipino ay patuloy sa kanyang pakikipagtunggali sa buhay… sanay sa hirap… may lakas loob na tumawa sa ilalim ng nakatambak na problema … at sa kanya, ang pinakamahalaga ay ang mukha ng buhay na nagdudulot ng tamis at ligaya… ang pag-ibig… ang pagmamahal… ang pusong mamon… ang ‘pitik-mingaw’… ang mga magka-ulayaw sa pinilakang tabing… haaaaaaaaaaaaaay… kaya’t,  tuwing lumubog ang araw pagkatapos na magmano sa mga matatanda at habang naghahanda ng hapunan ay panay ang sulyap sa bintana… naghihintay… nag-aabang… nananalangin…na;

Sa pagsapit ng dilim ako’y naghihintay pa rin,

sa iyong maagang pagdating;

Pagka’t ako’y nababalisa, kung di ka kapiling…

bawa’t sandali’y mahalaga sa akin.

       Mga kataga na binubulong ng kalooban…puno ng pag-asa… puno ng pagmamahal… sabik na makita ang mukha ng kanyang pinaka!… (alam mo na!)

       Habang nilalarawan nitong isip ang mga nakaraan… saksi, ang mga pusong pinag-isa ng tadhana…ang mga maligayang sandali… Habang nakamasid sa karimlan, hinahambing ang pakiramdam sa mga na-aaninag at naririnig na mga bagay sa kapaligiran…
   

Tulad ng ibong malaya ang pagibig natin,

tulad ng langit na kay sarap marating…

Ang bawa’t tibok ng puso’y kay sarap damhin,

Tulad ng himig na kay sarap awitin...

          Yes ! … halos pasigaw na ibinulalas ng iyong kalooban ang mga katagang nabuo na nasa isipan … pati tibok ng iyong puso ay naririnig mo… ibong nananahimik sa kanyang pugad ay pinakialaman… ultimo langit ay iyong nakikita  na nasa likod ng karimlan… ang iyong isip na tuliro ay nagde-deliryo… Maraming makata, manunulat, mag-bobote, presidente; atbp,  espesyal ka man o karaniwang tao… ang nasangkot… naging biktima… naging alipin… naging kung ano-ano!

        ‘Yung isa pinutol ang tenga, binigay doon sa minamahal niya?!?… ‘yung isa ininom yung ‘muriatic acid’ sa kubeta (napagkamalang ‘gin’!)… ‘yung isa bigla na lang namulot ng papel sa daan, binabasa ang bawa’t mapulot at nagsasalitang mag-isa (akala siguro ‘love-letter’ galing sa kanyang nobya!) … ‘yung isa nandoon na ngayon sa Iowa, United iStates of America, lampas langit ang tuwa sa natamong kaligayahan na binigay ng tadhana!... at, napakarami ang humantong sa harap ng altar at nagsumpaang magsasama sa hirap at ginhawa, mababad man sa apoy ng impiyerno o masukloban ng tubig ng ‘tsunami’, saksi pa ang baboy na may mansanas sa bunganga at ang mga nag-iinuman sa harap ng papaitan…

        Ayaw ng paawat itong karamdaman…tuloy tuloy ang paglakbay ng diwa at kaisipan, sa kasalukuyan ay nasa ulap  nakalutang… kung ikaw man, titigil ka kaya?

At ngayon ikaw ay nagbalik sa aking piling

Luha ng pag-ibig kay sarap haplusin,

Tulad ng ilog sa batis, hinahagkan ng hangin

Pag-ibig ang ilaw sa buhay natin…

       Magaan ang pakiramdam habang iyong nilalarawan ang iyong guni guni na nasa iyong tabi... ang iyong ‘prince charming’  o/ ang iyong  ‘leading lady!’... saksi pa ang langit sa himig na iyong naririnig… himig ng damdamin… himig ng pag-ibig.
       Ang huling linya ang pinaka-mahalaga;
 

Pag-ibig ang ilaw sa buhay natin…

Ito ba’y tutu-o ? ang nagdu-duda na tanong ng aking puso…

      Ayon sa prinsipyo ng ‘ ying & yang ’ , ang buhay ay nahati sa dalawang bahagi;  ang unang bahagi, ay malamig at matigas tulad ng isang blokeng yelo … ang pangalawa, ay lumiliyab, lumilikha ng init sa ating katauhan,

…itong umaapoy na kalahati ay ang – pag-ibig.

Ito ba ay iyong nararamdaman ? …naramdaman ?

o ngayon mo pa lang nalaman?

     Tulad ng iilan sa atin, itong pag-iibigan ng dalawang nilalang na siyang dahilan ng pagka silang nitong panutsang awitin ay humantong sa hindi natin inaasahan… sila’y hindi nagkatuluyan… ang dahilan ay hanggang ngayon, hindi ko pa alam… subali’t itong himig ng pag-ibig ay nagkaroon na ng sariling buhay… lumakbay na mag-isa … naging bahagi ng buhay ng karamihan… may dulot na pag-asa at maluwalhating alaala… at sa mga ‘galawgaw’ naman, ito’y patuloy na nagbibigay buhay sa mga ugat na malapit ng mamatay!

      Katulad mo…ako’y sumasagwan sa ilog ng buhay… dumadaan sa pangkaraniwan… dumadaan sa kahiwagaan… maraming katanungan ang hindi pa nabigyan ng tamang kasagutan…ang isa sa mga ito, ay ganito; iilan ba sa atin dito,  ang makakagawa o nakakagawa na ng gawain para sa kanyang kapuwa na ang tunay na dahilan ay ang – pagmamahal ?

tunay na pagmamahal - walang hinihintay na kapalit o kabayaran?

ang  …  ibong malaya …

langit man … ay nais n’yang marating

ang …   tibok …    ng puso…

tulad ng  himig ng pag-ibig…

natin.

na na na … na na na… na na na…

Na na na, na naaaa… na na na na na na na naaaaaaa…

"Himig ng Pag-ibig"
Lyrics and Music: Lolita Carbon
Performed by: ASIN 
From the album: Himig ng Pagibig

noy pillora (Mike "Nonoy" Pillora) is a Filipino singer, songwriter, composer, arranger, performer, painter, sculptor, and was a creative writer for Focal Magazine (Serving the Filipino Communities in Israel).

noy had been in the Philippine music scene for three decades of his life. He started singing with Saro(Cesar  Baňares Jr.) and they were simply known as; ‘ Mike & Cesar '. After a year as a duo, Nene (Lolita Carbon) joined them and together they became one of the Philippines’ most popular group named ASIN. Together with the release of their third album, Himig ng Lahi, Pendong (Fred Aban Jr.) officially, became the fourth member of the group.

Ang Buhay Ko

         Nagmula sa lalawigan na napapaligiran ng dagat  ...mga ilog na nakakalat sa islang hugis medyas. Patag na mga bukirin sa paanan ng tumutubong bundok ...na kapag nagagalit ang bunganga nito'y umuusok!

Halos lahat ay nagtatanong doon sa aming bayan

Sa gitnang kanluran na aking pinagmulan

Sila'y nalilito kung ba't ako nagkaganito,

Kung ano ang dahilan, ako lang ang nakakaalam.

noy pillora jr. 

          Sa hinog na kaisipan ay lakas loob na hinarap ang kapalaran, matatag ang kalooban na nakikipagsapalaran. Sumalungat sa mga payo ng mga nakakatanda, tinahak ang landas  ng sariling kagustuhan . Dahil ang sinusunod ay ang bulong ng damdamin, maraming beses ng nadapa sa karimlan ng hangarin. Ngunit; sa bawat tayo niya ay may panibagong lakas na tumutubo, mula sa mga nagkakandarapang karanasan na nadadaanan. Ang bakas ng alaala sa diwa niya ay naiiwan at sa madla'y nangumpisal sa ginawang hakbang...

Magulang ko'y ginawa na ang lahat na paraan

upang mahiwalay sa aking natutunan

subalit iniwan ko ang ibinigay na karangyaan

kung ano ang dahilan ako lang ang nakakaalam...

          Ano naman kaya ang dahilan na ito, na siya lang ang nakakaalam? Hakbang na mahiwaga na tinatago sa kaloob-looban? Pinilit ng mga magulang na tapusin ang pag-aaral ...iginiit nila ang kanilang kagustuhan, sa isang katulad ko na pinaglihi sa kalayaan? Isinaulat ng mga nakakatanda ang karangyaang aking makamit pag tinupad ko ang kanilang kagustuhan. Sa mata ng aking pamilya't mga kamag-anak, ang awa ay aking nakikita. Kina-aawaan ang aking magiging kalagayan, sa hindi pagtupad sa kagustuhan ng magulang.

          Subalit masigasig ang lumiliyab na damdamin, walang takot na tinahak ang marusing na lansangan, na kung saan hahantong, sa totoo lang, ay hindi ko talaga alam! Ako'y tumagos sa ga-bundok na pagsubok, dinanas ang hirap... gutom ay pinapalampas. Tinaguriang lapastangan sa pagsuway sa magulang, ngunit buong tatag na hinarap ang nakatakda na kapalaran.

         Sa di malaon ay aking naramdaman ang bunga ng aking mga hakbang. Naibulalas ang mga hinanakit, naisulat ang mga malasakit, unti unting nabuksan ang mga nakapinid na mga pinto, tungo sa minimithing malayang pag-iisip.

       
Nilagyan ng himig at ibinulong sa hangin ...ang kagandahang dulot ng mundong umiikot ...ako'y nakisabay sa kanyang pag-ikot. Buong pusong inawit ang pangit at kagandahan ...na panay bahagi lamang nitong buhay na dinadaanan. At sa di malaon ay ibinulalas ang nakatagong dahilan... na tanging puso ko lamang ang nakakaalam... 

Musika ang buhay na aking tinataglay

Ito rin ang dahilan kung ba't ako naglalakbay.

        Umabot sa kung saan-saan ...inikot ang buong bayan. Umabot sa tuktok ng katanyagan ...nakakalakad sa daan na may kalayaan. Nang muli akong napadpad sa lupang pinanggalingan ay walang kurap ang mga mata na hinarap ko ang aking mga magulang ...ang buong pamilya na minsan ako'y hinusgahan, at ang mga kamag-anak na minsan ako ay pinagtawanan. Ang katatagan na tumubo sa loob ko ay tumayo at dahan dahang sinalaysay ang katarungang namamahay na sa buhay ko, hanggang ngayon ay sumasabay . . .

Kaya ngayon ako'y narito upang ipaalam

Na di ako nagkamali sa aking daan

Gantimpala'y di ko hangad na makamtan

Kundi ang malamang tama ang aking ginawa...

         Lingid sa kaalaman ng karamihan, ako'y sinibak ng aking mga kasamahan sa dahilan na ako'y hadlang sa kanilang pansariling kapakanan. Pinalaganap ang paratang na sinungaling at ako'y  tiniris ng mga kuko na maitim pa sa uling. Dinugtungan ko itong aking kasayasayan ng mensahe na galing sa damdamin. Sadyang isinulat para sa aking mga kasama na; ang isa ay naglalakad na walang ulo at ang isa naman ay naglalakad ng patalikod! (...ang hirap noon ah!?) ...at ang isa naman ay naging anino ng ibang tao na malakas ang  kutob ko ay siyang nagpasimuno. Ayon sa ulat ni Saro; hinirang ng anino ang sarili at pinapakita sa kilos nito na sa grupong ito, siya ang pinuno. Ika nga ni Buddha; may tatlong bagay na hindi natin puwedeng itago. . . isa - ang Araw... pangalawa  - ang Buwan... at pangatlo ay - ang Totoo...say mo?

        
Sana'y hindi pa huli na sila'y pukawin ng kanilang mga awitin at ng maituwid nila ang kanilang sinungaling ...at kung saka-sakali man, na piliin nilang  manatili sa kalagayan na kanilang pinili, tiyak na may pamamaraan ang langit na uusigin ka ng iyong budhi. Kaya mga kababayan;

Tuloy ang kasaysayan . . . tuloy ang tugtugan

tuloy ang mga sinungaling . . . tuloy din ang tutuo.

Iisa ang pupuntahan. . .marami ang daan;

kung paano ka makarating . . .

nasa sa 'yo na 'yan!

         Oo, ang lahat ng nilalang dito sa mundo ay may kanya-kanyang daan, tuwid man o paliko-liko, iisa lang ang pupuntahan ...tayong lahat ay tutungo sa Dakilang Maylikha, na siyang nagmamay-ari nitong langit at lupa.

         Pag ikaw ay sinungaling ...baluktot ang iyong hangarin ...magnanakaw na pulitiko ...ma-dramang presidente ...mahikero ka sa kongreso ...'swindler' ka sa kapuwa mo ...at iba-iba pang katangahang katangian na sa ibabaw ng lupa ay na-imbento - - ang landas mo po ay Liko-Liko.

         Ang tao na ang tinatahak ay ang landas na hindi humihiwalay sa katotohanan ay ang siyang nasa - Tuwid na Daan, at tiyak na makakarating sa kandungan ng katahimikan. Kaya,  kung paano ka makakarating sa minimithing hangarin ay…

...nasa sa iyo na 'yan!

        ...nasa damdamin mo . . . nasa utak mo . . . nasa bulsa mo!? . . . nasa katauhan mo . . . nasa pamamaraan mo . . . nasa katangahan mo . . . nasa Mc Do! . . . hindiiiiii! . . . nasa  'jolibeee' ! ! !

. . . heh! tigilan mo nga ako!?!

“Ang Buhay Ko”
Lyrics & Music:   noy pillora

Performed by :    ASIN

From the album :    Masdan mo ang Kapaligiran

noy pillora (Mike "Nonoy" Pillora) is a Filipino singer, songwriter, composer, arranger, performer, painter, sculptor, and was a creative writer for Focal Magazine (Serving the Filipino Communities in Israel).

noy had been in the Philippine music scene for three decades of his life. He started singing with Saro(Cesar  Baňares Jr.) and they were simply known as; ‘ Mike & Cesar '. After a year as a duo, Nene (Lolita Carbon) joined them and together they became one of the Philippines’ most popular group named ASIN. Together with the release of their third album, Himig ng Lahi, Pendong (Fred Aban Jr.) officially, became the fourth member of the group.

Itanong mo sa mga Bata

      Taos pusong nagpapasalamat ang aking kaluluwa at ako’y binigyan pa ng isang araw dito sa mundo…(sana kayo din). Ako’y nagising sa larawan ng isang alalala na nakamasid sa mga batang naglalaro sa aking harapan habang ako’y naka-upo sa baitan ng hagdanan. May nahahabulan… may nagtataguan… at sa bandang kanan ay isang lupon ng mga batang kababaihan na nagpapantero… sa isang tabi, ay isang batang umiiyak sa dahilang siya’y hindi isinali! Minsan, ako at ikaw… ay naging isa rin sa kanila… walang ina-alala kung ano ang mangyayari sa susunod na umaga… sa musmos na kaisipan,  

Tears as Manobo boy sings Asin's "Mandan Mo Ang Mga Bata" on the live semifinals of the second season of "The Voice Kids"

ang lahat ay nasa kasalukuyan,

walang kahapon  …  walang bukas

     Naghatid ng kasabikan sa aking nag-iisang puso, ang mga nagunita  ng naiwang alaala… ako’y nag-isip… ng nag-isip… ng nag-isip… hanggang sa ako’y naidlip sa aking isip…ako’y gising na nananaginip… at unti- unting lumitaw ang mga tanong na nagsusuntukan sa aking isip …

Ikaw ba’y nalulungkot ? Ikaw ba’y nag-iisa ?

walang kaibigan, walang kasama…

     Habang binanabasa itong mga kataga, ang puso ko’y parang pinipiga…sa kalungkutang nararamdaman… nakikihanay sa mga nangungulilang kalooban… lumulutang sa mga katanungang…

Ikaw bay’ nalilito, pag-iisip mo’y nagugulo?

Sa buhay ng tao, sa takbo ng buhay mo…

      Kon todo ang pagkalito, itong makata ay tumakbo, habol ang hininga na lumabas  sa mga nangyayari at pinagmasdang mabuti ang mga pangyayari… sa kanyang isip na di niya mawari… at sa mga tanong na umuuntag sa kanyang guniguni…

Ikaw ba’y isang mayaman ?  o/ ika’y isang mahirap lang?

Sino sa inyong dalawa,  ang mas nahihirapan?

       Sino nga ba kaya? Ang tanong  nitong makata… sapat bang katumbas ang salaping iyong kinakabig, kung ang iyong anak o ang iyong mga anak ay halos di mo na nakikita; isang oras sa umaga ay napaka haba na, at sa gabi pag ika’y umuwi sila ay tulog na ? Tuyo sa pagmamahal ang iyong puso… dahil ang laman ng iyong kalooban ay ang: takot , na ika’y ma-isahan… ang laman ng iyong utak ay paano ka maka delihensiya… ang naririnig ng iyong tenga ay ang kalansing ng pera… at ang guhit na nakikita sa iyong mga mata ay ang:  $  …hindi ko na dapat sabihin pa ang nilalaman ng kalooban ng mga maralita… nasa kanila ang init ng pagmamahal sa kapuwa… nagtutulungan… nakikiramay sa mga kapus palad na tulad nila … nagkibit balikat na lamang itong makata, at itinuon muli ang kanyang paningin sa larawan ng kanyang kaisipan…

Masdan mo ang mga bata…masdan mo ang mga bata

Ikaw ba’y walang nakikita, sa takbo ng buhay nila ?

Masdan mo ang mga bata…ang buhay ay hawak nila…

Masdan mo ang mga bata…ang sagot , ay iyong makikita

     

       Napakaraming katanungan sa isip niya’y nagliliparan…nais niyang ipadama ang kanyang nadarama… sa iyo… sa inyo… sa ating lahat… Dunong ang ipinamana ng bayaning pinaka-dakila, nang sabihin niya na;

  

                   “ Ang kabataan ang siyang pag-asa ng ating bayan .”

     Nasaan ang katotohanan sa likod nitong kasabihan ? Sobra na nang isang daang taon ng lumisan si Rizal…subali’t;  Bakit ang mga matatanda pa rin ang siyang may hawak ng kapangyarihan ng ating bayan? ...Mayroon din namang mga bata...pero isip matanda! kaya tradisyonal pa rin ang pag-iisip...(hmmmmp sinabi mo pa!) ...at, mayroong mga nanunungkulan na uugod-ugod na sa katandaan, at tadtad pa sa sakit ang katawan ay ayaw pa ring umalis sa kanilang upu-an… dahil ba sa kagustuhan na sila’y magsilbi sa sambayanan ?... at mahal nila ang kanilang kapuwa, kung ba’t ayaw nilang umalis sa kanilang katungkulan?

       Ang katotohanan… alam na ng karamihan…alam ko, at alam mo… ang talagang mahal nila ay ang kanilang upuan… ang kapangyarihan na kanilang hinahawakan. Ito ang ayaw nilang bitawan !…kaya walang pag-asa ang mga kabataan !

       

  

Ikaw ba’y ang tao, na walang pakialam sa mundo ?

Nguni’t ang katotohanan,  ikaw ma’y naguguluhan…

Ikaw ba ang tinutukoy nitong katanungan?

 

      Hawiin mo ang ulap na gumugulo sa iyong isipan… dahil pag ika’y naguguluhan madali kang gawing uto-uto… iyan ang sandata ng mga gahamang makapangyarihan… kaya’t ang taong bayan ay lagi nilang ginugulo… Isaisip…isapuso… na;

Tayo ay naglalakbay, habol natin ang buhay

Ngunit ang maging bata ba’y tulay,  tungo sa hanap nating buhay ?

       Pabulong na sumigaw ang may gawa nitong tula… Walang duda ! na ang mga bata ang siyang tulay… sila ang may dala ng bagong kaisipan… nasa kanilang katauhan ang inerhiya (energy) ng kaunlaran... malalakas ang  loob na sinasagupa ang pagsubok ng pagbabago …sila na mismo ang pagbabago! ... sila ang kinabukasan!

   

       “Kalokohan !”…pasigaw na sagot ng mga matatanda. “Totoy pa kayo” …nangungutya ang boses na parang galing sa ilalim ng lupa, ang salita ng isang naka-upo sa ‘wheel chair’… “Hindi n’yo alam ang inyong mga sinasabi !” …pabulyaw at makapangyarihang boses ang ginamit  (ala- Pavaroti), ng isang may hawak na tabako at sa kabilang kamay ay kopa na may lamang vino .

        Marahang nagsalita itong makata, … malamig ang boses, lumuhod at nag mamakaawang nagsalita ;  

“ Masdan mo ang mga bata …ang aral sa kanila makukuha;

Ano nga ba ang gagawin ?... sa buhay na hindi naman sa atin? ”

      

     

Muli kong minasdan ang larawan sa aking harapan… ang mga batang naglalaro at natatawananan ay napalitan ng mga batang namamalimos sa  mga daan… gumagala sa lansangan na walang patutunguhan… sa kanilang mga mukha ay aking nakikita, ang pagkawalang pag-asa sa mga dumadating na umaga… Inikot ng tadhana  ang mundo ng mga bata !?!  Pero…teka, ako’y napa buntong hininga, may bahid ng  kalituhan sa mukha ko’y mailarawan… tadhana nga ba kaya ang may pakana? … o/ ito’y kagagawan lang ng aking kapuwa?

      Ang bawa’t isa’y may kanya-kanyang sagot sa mga katanungang idinulot… ang kamay ng katotohanan ay ang tanging makapagbukas ng hiwaga na bumabalot sa ligaya at pagdurusa…paano naman kaya natin malaman ang tamis na dulot ng ligaya, kung hindi natin maranasan ang pait na dulot ng pagdurusa ?

Itanong mo sa mga bata…itanong mo sa mga bata

Ano ang kanilang nakikita ?... sa buhay na hawak nila…?

      Kung ito’y iyong masagot… kabilang ka sa mga bata… pag ito, para sa iyo, ay isang haka-haka na likha lang ng kaisipan… ikaw ay mapapabilang na sa mga matatanda !... palubog na! …handang ipaglaban hanggang sa kamatayan ang iyong ari-arian…lahat na hindi puwedeng pagkakakitaan ay MALI !... at lahat na puwedeng madelehinsiyahan ay TAMA ! Ito ang patakaran ng iyong moralidad….

Masdan mo ang mga bata… sila ang tunay na pinagpala

Kaya dapat nating pahalagahan, dapat din kayang kainggitan?

      Ito ay dapat na maintindihan ng bawa’t kabataan ng ating bayan; at hindi lamang sa ating bayan, kundi pati na rin ng lahat na kabataan sa sanlibutan… dahil kung iyong titingnan… sino-sino ang may hawak ng kapangyarihan sa mga bansa ng sanlibutan?... mabibilang lang sa daliri ang mga bata o/ yaong nagdadala ng kaisipan ng mga kabataan…

      Ang karamihan po sa kanila ay mga manhid na matatanda…takot sa pagbabago… takot sa kanilang sariling anino… ginugulo tayo sa pamamagitan ng digmaan… at ang masaklap pang balita ay; tayo ay nilalaro ng mga ito…ginuguyo… inu-uto-uto… niloloko… ginawang gago si Rizal… at, lahat tayo’y ginawang gago !

      At ang karamihan po sa atin  ay :

nagpapalaro ! nagpapaguyo ! nagpapaloko  ! nagpapa-uto!

nagpapa- gago!

 

Kaya kung ikaw ay isa sa mga nabanggit, itong huling habilin ay baunin mo !

Masdan mo ang mga bata…masdan mo ang mga bata

Ikaw ba’y walang nakikita sa takbo ng buhay nila ?

     

Pagod na itong makata…tumayo, tumalikod at payukong humakbang ng palayo… sa kaguluhan… sa mga nagda-daldalan… patuloy na naglakad ng palayo… at palayo … palay …pala… pal …pa … p … *  …hanggang sa siya’y tuluyan ng naglaho …naglah …nagla …nagl …nag …na…n… *  

        Ako’y naiwang nakamasid sa dilim… at ang ma-aaninag lamang ng aking kaisipan ay ang mga katagang iniwan ng pumanaw na makata;

Masdan mo ang mga bata, ang buhay ay hawak nila,

Masdan mo ang mga bata,

...ang sagot , ay iyong makikita.

"Itanong mo sa mga Bata"

Lyrics and music : Saro Banares Jr.

Performed by       : ASIN

From the album   : Masdan mo ang Kapaligiran

noy pillora (Mike "Nonoy" Pillora) is a Filipino singer, songwriter, composer, arranger, performer, painter, sculptor, and was a creative writer for Focal Magazine (Serving the Filipino Communities in Israel).

noy had been in the Philippine music scene for three decades of his life. He started singing with Saro(Cesar  Baňares Jr.) and they were simply known as; ‘ Mike & Cesar '. After a year as a duo, Nene (Lolita Carbon) joined them and together they became one of the Philippines’ most popular group named ASIN. Together with the release of their third album, Himig ng Lahi, Pendong (Fred Aban Jr.) officially, became the fourth member of the group.